“जिनाहारिनि मेला”

फारफ़्रोमथिंबो खाबु खंख्रायदों खाबु फलानफोरा
गोरबो गोथै सोलेर सामलायरोङि लांसुनियाफोरनि
बोलि जानांदों आयजोनि दाय‌ गैयि सोलेर….
हब्रा हब्रा गोसोम खथाफोराव बाब्राबबायदों
राहानि आन्दायहारा नाथाय बारगआखै थिफ़्लिं बां सोलेरफोरा
गांहाबनाय सोलेर फोलोमनो
मेगन बेखेवजेन्नाय बिबारफोरबादि सोलेरावबो
नोजोर खोख्लैनो बावगाराखै बिसोर,
मोनफ्रोम फुंबिलिफोरा दा
जिनाहारिनि गोदान गोजाम खौरांफोरजों
जोबोद गिलुंयैसो बारलाङो
खौरांबिलाइफोरा जिनाहारि फोजोबस्रांनायनि गेदेर बानबुंथायफोरजों
साजायजायोल’ आद्रियैनो……..
नाथाय खारस्रानाय मोगथां फोरा बेसेन होआ
गु दान गु सान गोरबोआव बोनथुमना
जोथोनै फेदेरबोनाय बिमा गोरबोआ
बरादखौल’ दुसिदों मांखरसालिनि सेर सेर…….

आरासियाव दा गावखौ नायब्ला
बायहाजार सोंलुफोरजों गोरबो जामब्रिनाङो
मेंग्लिहाबनाय सोलेरा फिन्नाइनि हाबिलाजों खुद्रिखाङो
जाथाय फिनजाथाय गिलुं बुब्लिफोराव
गावखौ आबोर खालाम खालाम
मुलुगनि बायहाजार खौरांफोरा आनज्रायलाङो  आं मिथिस्लाबै……!!
आं दा सोंनो लुबैयो बैसोरनियाव,
“बेटी बचाओ बेटी पढ़ाओ”
अख्रां गोमसारनाय स्लगानजों
मोगथां सावगारिफोरा थारै गाब गोनाङै साजायजामारदों ना ???

BY – उदांस्रि ब्रह्म
मैथाबारि,पाटगाव
Department of history ,
4^th sem at Bodoland University, kokrajhar