उन्दुनो हायै हर

               लाउगिया सिख्ला देलों लों15 बोसोरनि लाइमोन सिख्ला।बिमा बिफानि सायाव आरामै देरनाय। बारा गोथौ सानफेरा मिनि हाला-हाला सनसल एबा रेजें गोसोनि।जि थाखोआव फरायबाय थानाय बैसोआवनो हरखाब सानसे लोक्षि फुजानि मेलायाव सासे मुसलमान सेंग्राजों लोगो मोनलायनानै बै सेंग्रानि महराव हायना नांओआरो आरो जानबुं नम्बर होलायनानै गोसो थोलायनाया जागायजेनो।लाउगिया बर’रावनि अनगायै गुबुन जेबो राव रायज्लायनो रोंआ। नाथाय माबोरै बै मुसलमान सेंग्राजों गोसोनि खोथाखौ माबोरै रायज्लायो बुंसनो हाया।लाउगिनि गुबुन हारिनि सेंग्राजों मोजांमोनलायनायखौ बर’सेंग्राफोरा नोजोर होदोंमोन आरो बै सेंग्रानि फ्राय बासायनो थाखाय नाजादोंमोन। मानोना गोबां गुबुन हारिनि सेंग्राफोरा बर’एबा ट्राइबेल हारिनि सिख्लाफोरखौ हाबा खालामगोन होन्ना लांफ्लानानै फानहैनाय एबा जिनाहारि खालामनानै बुथारनाय जाथायफोरा गोदान नंला जाफ्लेबाय थानाय जाथाय।एमब्रायैनो लाउगिया बै सेंग्राजों हाबा जाहैनायसै। हाबा जाखांनायनि उनाव लाउगिया गोबां दुखु खस्थ मोनदों। मानोना बै सेंग्राया गोरिब नख’रनि फिसा। सानसे हाजिरा मावाब्लानो ओंखाम रसा नांओ। दुखु खस्थ नि गेजेरजों दा लाउगिया गथ’ सासेनि बिमा जाबाय।बिनि गुबै मुंखौ सोलायनानै आबुं मुसलमान हारिनि मुं दोनबाय दा बिखौ आफिया बेगम मुंयैसो गाबज्रिसै।समा बाबेनलांनायनि उनाव लाउगिखौ जौथुक मोनैनि थाखाय इनाय साजा होनायफोरा सोलिबाय थासै। लासै लासै बर’जाति नि मुं लानानै निन्दा खालामनाय , जौ लोनग्रा, अफ्रि जाग्रा, अमा जाग्रा बायदिसिना रावजों सोंखारिनाय फोराबो सम सम सोलिबाय थासै। उन्दै बैसोनि लावगिया जोबोद सहायनांदों हरफामानि उन्दुनो ओनखारा आरो फारसेथिं नआव, गामियाव थांबोला नेवसि जायो,फोथारजायो। साफ्रोमबो सुबुंफोरा निन्दा खालामो।लाउगिनि हौवाया जेसेबां खस्थ खालामब्लाबो जौ लोंफेरा। रां खावरिनि ल’जिंगा सियो। बियो बरफोरा’नि जौ लोनग्रा आरो फेनाय बायदिनि सायाव जेब्लाबो निन्दा खालामग्रा जाबाय। सानसेखालि नि बाथ्रा कर’ना मोरोना गुबुन गुबुन हादरजों लोगोसे आसाम आरो B T Cहालामावबो गोबां रोखोमनि बारायनो हमो आरो गोबांआनो जिउ गोमानांदों। दांदेरऩो मोना थांलाय फैलाय खालायनो हाया बायदि बायदि बाथ्राखौ साननानै आंखालजों नाख्रेब जानाय लाउगिनि न’खराव दुखुजों गोजोनै उन्दुनो ओनखारा। बे समावनो ससियेल मेदियाफोराव बाथ्रा बुंसोलायदों। कर’ना बेरामनि मुलि नि सोमोन्दै जाय फारा फारि बाथ्रा बुंसोलायदों आरो नंगौ नंआ मुलि दिहुनदों। मानसिफोरा गिनाय संखिनायजों जायनो जेखौ बुंदों बेखौनो जालाबायदों। बिनि गेजेरावनो सानसेखालि सासेया बुंबाय कर’ना बेरामनि मुलिया जौ होनना फोसावबाय। बेखौ खोनानानै लाउगिनि हौवाया गोसोआव नांबाय आरो हिनजावखौ बुरखायनानै बुंबाय।बर’फोरनि जौ बिदैखौ मोनब्ला जों गासैबो नख’रनि सुबुंआ कर’ना बेरामनि फ्राय बासायनो हागोन। बिनिखायनो नों बेखौ मोन्नायनि राहा खालाम होननानै बुंबाय।गमायैनो लावगिया जौ बिदैखौ जगार होबाय। दानिया मोनायाव जाखां लोंखां उन्दूनोसै समाव जौनि रोसिखौ गासैबो नख’रनि सुबुंआ गथ’गथाय बिमा बिफाया खर’मोदोम,दारि जेरावबो फोननानै लाजोबनायसै। ओइदिनखालि हराव जौ बिदैखौ फूननानै लानाय लोगो-लोगो नखरनि गासैबो ओलोस्रो ऊन्दुहाबनानै थानायसै।मुसलमान हौवानि दारियाव थानाय थिमा लाउगिनि खानायाव थानाय थिमाफोराबो निसानांजोबनायसै। गथ’सायाबो फेनानै दलर सेल सेल उन्दूनानै थानायसै।जौ रोसिनि फेनाय जों ओइदिनखालि नि हराव हरसे मोजांयै उन्दुनानै थानायसै। नंङा ब्ला सानफ्रोमबो जिंगायावनो उन्दुनो ओनखारा मोन ।रावनावबो थानदेरनो मोनला बेफार खालामनो मोनला,मा मावनानै मोनजाबावगोन,बिदि सानै सानै हरसेमानि उन्दुनो ओनखारा मोन ।बै दिनखालि हराव नाथाय निसा नांनानै करना मोरोनननि गेजेरावनो गोजोनै उन्दुलांदोंमोन।

By – Balika Narzary
Education Department
college Name – N k Betbari high school