बिखुनजोनाव आलासि जाहैनायाव

लन्टायझार (पानबारि) बिखुनजो लाहानाव आलासि जानो थांनाया मैया खम जाबोदों। गोसोखाङोब्ला लाजिनो ना रागा जोंनो ना मिनिनो मोनफ्रांगारदां। बेसेबा गोबावनि उनाव बिखुनजोनि न’ गाहैनाय खम अनदों, जानायनि लोंनायनि रायलायनायनि खमखि आदर लादों आंखौ बिखुनजोआ। आं लांनाय मिसती नेमकी, अमा बेदर सेरनै, गोजा पुरा बतल गंसे बेखौबो आंनोनो होजुबदों होनोब्लाबो बुंजागोन। बेथ’ बे आरोबाव, गावसोरहाबो थिना दोन्नाय दावला खासि गेदेरखौ बुथारबावदों आरो गोथां लोंनोना सावनाय लोंनो लों जावैसो आबा होनना पलिअखौ कापआव लुसोम लुसोम होदों। मेगना एसे मोग्रेमबा हासुनो थांनायाव लेट्रिनावनो खनसे गुग्रुबदों। रावबो नुआसै, रावनोबो गम होआसै। एसे मोनाज्लिद जाबा बिखुनजोनि सिगाङाव बुंदां— आं दसे उन्दुनोसै आयै एसे फेबाय आंखौ। ओजों फारसेथिं बाबु बिमाया दोखो रायना होदों। नआव थांफिननांगौआ उन्दुनासो थादों बियो बायदि बाय। खर’ सानायजों जाबजों खोमाखौ हमथेना लादों आं। दिनै फुंआव 7:30 बाजिबाय,आं अब्लासिम उन्दुबाय दं, हिनजावा गले गले फोजादों सिखारनो थिनदों। बिसिनायाव हरखाबै दांसनबाय आं, आयहाव मा गिसि?! बाबुआसो….. नङा बियोथ’ बिबैजोंसो उन्दुफादोंमोन। आसुं आबुं जादों आं। खायदा बोराय बाहायनो सुलु लादों। आराम दलत सिखारना बिसिनाखौ खमबलजों आराम बना दोनदों आं। दानिया नआव फैनांगौनि फारि जेरैखि जाया माबा मोनसे खामानि दिन्थिफ्लाना नआव थांनांसिगोन। नङाब्ला मिथिगौ बिखुनजोआ हगार हरखानाय नङा। अफिसनि आरजेन्ट खामानि दं होनना बिखुनजोखौ थगायबाय आं। बिखुनजोआ हले ब्रा ब्रा ओंखाम जाबोनो थिनदोंमोन। उनाव दे जावैसो आबा खामानि दंथारोब्लालाय होनना हगारहरबाय अख्रा खालामा जासे। बाबु, बाबु बिमा आं ब्लद फैनायसै। लामा थारै सानबोबाय थादों आं— बिखुनजोआ आं उन्दुनाय बिसिनाखौ बुस्रांआब्ला हामगौ, बिखुनजो दांनायनि सिगां बिसिनानि सिआ रानग’ब्ला हामगौमोन। नङाब्ला मान सनमाना सेस! दाथ’ बारग’बोबाय। फैगौ बोसोराव आलासि जाहैफिनोब्ला बिखुनजोआ खोथाथे बाथ्राथे थे बुंनांगौब्ला खम जारला जागोन “जावैसोआ थांनाय बोसोरनि बैसागुआव बिसिनायाव हासुलानाया?” मान सनमाननि खोथा दं। बिसिनानि सिआ दाहालागै राननानै थाबायब्ला हामथारगौ।

BY –    दैमासा ब्रह्म।
                                                                                    B.A. 5th Sem(Economics)
                                                                                           Bijni College, Bijni