आथिखाल मुगा

लामाया होंगो दोंगोथार माथो हनै
आगानफोराबो ब्रेव-ब्रेव ,
थोंसे आथिं खोख्लैनो
जायगायानो गैगु लायथारा माथो ।

आगानालाय माथो दद’ माद’सो जाबाय..
दावबायनो गाहाम लामायानो गैलियासै नामा.?
ना मेगन थासेयावबो मेगन गैयि बायदि
आन्दायनानै लामा गोथेजानंदों..?

गोमखावलायनाय गारि-मटर साखावदों
दखान गलाफोराव रेल गारिनि उखुन्दै खुफुंदों ,
लामा द’था बिफां सायहाफोराव
दाउ मैना ज’रा दाउखा सिलाफोरनि हान्जा ।

जेरावबो दल दामनायनि सोदोब
रावबो रावनिखौबो खोना संलायथाराखै ,
जाय जेरै हागौ एरै दामदों
बयहाबो मुखुबथार सोदोब रिंखां होनायाव ।

खेंख्लें-खांख्लां सैमा अरलायनायनि सोदोब
मावजि अरलायनो बोलो फोरानाय गन्थंनि सोदोब ,
मैसो-मोसौ बेह्रानि सौलायनो हारां खुंनायनि सोदोब
दसे आन्दाय गोमागुलायनाय हाद्रि खुफुं लायदों ।

आइयाथ बुङो हामा न’निजों न’नि नांज्लायनो-खमज्लायनो
आफायाबो  बुङो गिदिरा जेब्लायबो उन्दैखौ अननांगौ,
बे आगैयानो एदावग्रोयो आंखौ उफुद्रुग खालामो
आदायानो गिदिर जानानैबो आंखौ बुजिया बिगै होनना साना ।

जोंहासो न’नि जों न’निनो नों आरो आंनि फारागथि दिन्थियो
मालाय लांगोना मोखांनि आनै-आमाय मोनहा
नों दानागार आं दानागार अनज्लायनानै
ओंखाम मुथासेखौनो रानलायनानै जायो ।

मुं: सन्द्रिखा नार्जारि  
गामि: सेरफांगुरि 
लाइजाम ख’: मिलनपुर 
जिल्ला: बिस्वनाथ