दिनैनि मोनाबिलि

सोनाब  मोखांनि  फैसालियाव
जारौ  गाबनि  आबिर  सारफावदों
सोरांखौ  थाला  होनो
गसंफैदो  लांगोनाया
अखानायै थुब्ला जोखावनो ।

नखर  बिगुमाफ्रा  हांखुर  जादों
आदार  खनजानाय  दावब’आबो
बासाफारसे  बिरबोदों  फालोयै
हांसोफ्राबो  गग्रा  नागिरदों ,
फोथाराव  खाजानाय  मोसौफ्रा
राव  हरदों  बिगोमाखौ
लामा नायै गलियाव हाबनो ।

गोगोम थिकादार आरो आब’ फोरोंगिरिजो
आगान सुरबोदों गोगो बार जानो
गामिनि सरगजों लरेत लरेतनो ।

सानफ्रामबो लिंहरो मोनाबिलि
थाम- आलिनि दालान न’आव
बाजैनि साहा ग’लायाव
मम’ सावमिन फकराफोरा
सनाथी अनसुमा मौसुमीमोनखौ
जुथि खहाबनाय मोदोमफ्रु मोदोमना ।

बारफुं खामसार खुदियाफोरा
बाईक सिबलानानै साहाफारसे मोखां
बबेबा ख’नायाव खाबु नागिरदों
मानिबा खहाबनाय जुथि लादों ।

दिनैनि बादायारि मोनाबिलि
बिमा दाबफा बिफा फारफा
जाय फारा- फारि फिसाफ्रा
गोसो आरो उदैनि आदार नागिरना
थुदो-थु सिगांदो बयबो खालामाब्लानो समखौ आद्रि आद्रि

                                 BY – Nila Basumatary