by आनन्द राम औवार
बपरेटार’ड
26/07/2023 इं

बर’ रेबग्रा जथुम

               फै एसे मिथिनि Home 

• बर’ थुनलाइ आफाद जोनोम : 16 नबेम्बर, 1952 इं
  साहित्य अकादमीजों गनायथि जानाय अक्ट: 17 अक्टबर, 2005 इं
  बर’ थुनलाइ आफादा साहित्य अकादमीजों गनायथि जानाय गिबि बर’ थुनलाइ गौथुम
• बर’ रेबग्रा जथुम जोनोम: 17 मार्स, , 1985 इं
  साहित्य अकादमीजों गनायथि जानाय अक्ट: 9 डिसेम्बर, 2015 इं
  बर’ रेबग्रा जथुमा साहित्य अकादमीजों गनायथि जानाय नैथि बर’ थुनलाइ गौथुम ।
• बेयो जोंनि बर’ हारिनि थाखाय बर’ हारिनि थुनलाइ मुलुगनि थाखाय गोगगानाय रंजानाय बाथ्रा नङा होमब्ला?
  • भारत हादराव खायफा मोनफा रावाव मोन 10 निख्रुइ बांसिन थुनलाइ गौथुम साहित्य अकादमीजों गनायथि मोन्नाय दं!
  नाथाय बर’ रावनि बिथिङाव मोन्नै थुनलाइ गौथुमाल’ साहित्य अकादमीजों गनायथि मोनदों।
• 1985 मायथाइनि 17 मार्साव बर’ रेबग्रा जथुम दानायाव बर’ थुनलाइ आफादा मदद होदोंमोनब्लाबो बर’ रेबग्रा जथुम दानायाव थोंजों बाहागो लायाखै।
• बर’ रेबग्रा जथुम दानायाव बै समनि बर’नि मुंदांखा लिरगिरि मन’रन्जन लाहारी, बर’ थुनलाइ आफादनि आगु आफादगिरि ब्रजेन्द्र कुमार ब्रह्म, साहित्य अकादमी बान्था मोनगिरि जनिल कुमार ब्रह्म, जर’खा लिरगिरि,क्रिटिक्स , साहित्य अकादमी बान्था मोनगिरि धरणीधर औवारी, पद्मश्री ड० मंगलसिं हाज’वारी, जर’खा लिरगिरि मानब कुमार रामसियारी, बर’ रेबग्रा जथुमनि आगु आफादगिरि, जर’खा लिरगिरि बिजय बाग्लारी , ड० सुबुंसा मोसाहारी आरो गोबां गेदेमा लिरगिरि बिथांमोनखौ रायखांनो हायो। उननि समाव बर’ थुनलाइ आफाद, बर’ रेबग्रा जथुम, बर’ फरायसा आफाद बेफोर माहारियारि गौथुमफोरा खौसेयै एखे गौथुम महरै खामानि मावबोबाय थादों! रां रुफा ज ज बाहायबोनानै बर’ रेबग्रा जथुमनि बायदि थुनलाइयारि हाबाफारिफोरखौ मावफुंबोदों- – – ! बेनि उनाव? बर’ थुनलाइ आफादनिफ्राय बर’ रेबग्रा जथुमा रां रुफानि थाखाय सिथों सिथा खालामनायफोरखौ मोजां मोनाखै — — – बर’ रेबग्रा जथुमा गाव गावनो रां रुफा बथुमनानै थुनलाइयारि जथुमाफोरखौ बै समनि बर’ थुनलाइ आफादनि आफादगिरि मानगोनां ब्रजेन्द्र कुमार ब्रह्मआ बिथोन होयो- -! बेनिफ्रायनो जेन’ बर’ थुनलाइ आफाद आरो बर’ रेबग्रा जथुमनि फारागथिफ्रा एफा एफा सोमजिनो हमो! आरोबाव बेनि उनाव?? कलिकाता साहित्य अकादमी ब्रान्सनि सासे गोख्रों सोमोन्दो थानाय बाङालि लिरगिरि बिथाङा बर’ रेबग्रा जथुमखौ भारत सोरखारनिफ्राय गासैबो सुजुग सुबिदा मोननो थाखाय साहित्य अकादमीजों गनायथि लानो (Affiliation) बिथोन होयो आरो बिथां गेदेमा लिरगिरिनि बिथोनखौ लानानै बर’ रेबग्रा जथुमनि मावथि बिबानगिरि बिथांमोना बर’ रेबग्रा जथुमखौ साहित्य अकादमीजों गनायथि लानो गोसो जायो आरो हाबाफारिखौ मावफुंनो सिगाङो।
  नाथाय साहित्य अकादमीजों गनायथि लानो नागिरनाय बे हाबाफारिखौ बर’ थुनलाइ आफादनि खायसे मावथि बिबानगिरि, बर’ राव थुनलाइ अनसायगिरि बिथांमोना गनायना लानो बादोंमोन , माबाफोर सौग्रावलायगोन नामा बायदि सान्नाय सोमजिदोंमोन – – – — जिहेथु बर’ थुनलाइ आफादा साहित्य अकादमीजों 2005 मायथाइनि 17 अक्टबराव गनायथि मोनखाबाय! बर’ राव थुनलाइनि फोथाराव मानो मोन्नै गाहाम बर’ राव थुनलाइआ भारत सोरखारनि साहित्य अकादमीजों गनायथि लानांगौ? बर’ रेबग्रा जथुमा साहित्य अकादमीजों गनायथि लानांगौब्ला बर’ थुनलाइ आफादनि NOC नांगौ । बर’ थुनलाइ आफादा NOC होनो राजि जायाखैमोन आरो बेफोरबादिनो
  बेलेबेजे गोसो गोरोबलायि जानानै 5 बोसोरसो बर’ रेबग्रा जथुमखौ साहित्य अकादमीजों गनायथि लानो हायि दिन्दां जानानै थायो। नाथाय उनथाराव बै समनि बर’ थुनलाइ आफादनि आफादगिरि गेदेमा लिरगिरि पद्मश्री ड० कामेश्वर ब्रह्मनि गोगो सान्नाय गनायथि होनायाव साहित्य अकादमीजों गनायथि मोन्नो थाखाय बर’ रेबग्रा जथुमनो NOC लिरना होयो आरो बर’ रेबग्रा जथुमा 2015 मायथाइनि 9 डिसेम्बराव साहित्य अकादमीजों गनायथि मोनो आरो ओजोंहाय बर’ थुनलाइ आफादा बर’ रेबग्रा जथुमखौ बर’ थुनलाइ आफादजों लोब्बा गैयि जायखि जाया जथुमाफ्राव बाहागो लानो हायि खालामना होयो! ** दानिया बर’ हारिनिसिम लाखटकीया सोंथि —-थारैनो बर’ रेबग्रा जथुमा साहित्य अकादमीजों आलादायै गनायथि लानाया ( affiliation) गोरोन्थि जादों नामा ? बे बिथिङाव जोंनि बर’ हारिनि बर’ राव थुनलाइ अनसायग्रा गेदेमा लिरगिरि बिथांमोना मा बुङो?

** बर’ थुनलाइ आफाद आरो बर’ रेबग्रा जथुमा अराय समनि थाखाय बिबाबिनि नआव हाबलायि थैब्लाबो गोथै बोगारलायि जुदा जालायनानै थाबाय थासिगोन नामा?

--- --  जोंनि बर' हारिनि गोरों गोरा गेदेमा लिरगिरि बिथांमोना मा बुङो?

• बर’ रेबग्रा जथुमा साहित्य अकादमीजों गनायथि लानायनि उनाव NBT, New Delhi नि गेजेरजों दासिम गां 85 नि बांसिन जोबोद बेसेनथि गोनां गुबुन रावनि बिजाब बर’ रावाव रावस्लायबाय आरो बेनिनो गां 27 रावस्लायनाया बिजाब महर मोनबाय आरो गुबुन गां 50 नि बांसिन NBT, New Delhi आव साफायनो लाफारफाहार खालामगासिनो दं!

थांनाय 2022 मायथाइयाव NBT, New नि गेजेरजों बर’ रेबग्रा जथुमा सुजुनाय गां27 बिजाबनि रोजा रोजा बिजाब असम सोरखार, बिटिआर सोरखारा फरायसालिफोराव बेसेन नाङा जासे रान्ना होबाय। बेफोर गेदेमा खामानिखौ बर’ रेबग्रा जथुमा मावाखै होमब्ला?

सोनाब बंगआव बर' रेबग्रा जथुमनि गोख्रों मावफुंनायावनो गं 138 गुदि फरायसालियाव बा थाखोसिम बर' राव आयदा फोरोंबोनो हानाय आरो North Bengal University  , NBU, Siliguri आव बांला डिपार्टमेन्टनि हेफाजाबै दानसेमानि सा 138 फोरोंगिरि बिथांमोनखौ बिटिसिनि सोरखारनि मददयै  फोरोंथाइ होनानै बर' गोरों सार्टिफिकेट होनो हानाया बर' हारिनि थाखाय गेदेर खामानि मावफुंनाय जायाखै होमब्ला?  

नाथाय सोनाब बंग गुदि फरायसालियाव एसेबां गेदेर खामानि मावफुग्रा बर’ रेबग्रा जथुमखौ दानि गोदान बिटिआर सोरखार , बर’ थुनलाइ आफाद आरो बर’ फरायसा आफादा(ABSU) मानो बोखारना होखो? थारैनो सोनाब बंगआव इसेबां मोजां बर’ राव आयदा फोरोंनाय खामानिया फेलें जायोब्ला बिटिआर सोरखार ,बर’ थुनलाइ आफाद आरो ABSU आ दायाव गोग्लैआ होमब्ला?

• स’न’वाल कसारी (डिब्रुगड़) बर’ राव सोलोंनो नागिरनायाव फेलें जानायखौ बुंथ’लिया जेन’बा!
• बर’ रेबग्रा जथुमा मिसन लानानै फरायथौवारि थांखियै इन्द’नेसिया (2018),थिम्फु ( भुटान हादर) (2018), नरवे (इउर’प हादरमा, 2019),बांग्लादेश 2023 दावबायहैखांबाय।
• फैगौ 24 आगष्टनिफ्राय /2023 जापान हादरनि राजथावनि टकिअ, मिमासाका इउनिभारसिटि, जारिमिनारि थावनि हिर’सिमा नोगोरमा दावबायहैनायनि थांखि दं। बेफोर हाबाफारियाव बर’ रेबग्रा जथुमा जेबो फारागथि लाखियाजासे बर’ हारिनि गेदेमा लिरगिरि राजखान्थिगिरि बिथांमोनखौ सरजाबफाना लादों। नरवेनि बड’ नोगोरमानि ( BODO CITY) नर्ड इउनिभारसिटि ( NORD UNIVERSITY) , इन्द’नेसिया हादरनि बालिदिबनि राजथावनि डेनपासारआव उदयाना मुलुक सोलोंसालि, गनेशा मुलुग सोलोंसालिनि सेमिनार सावरायनाया जोबोद बेसेनथि गोनां गियान मोनबोनायमोन।
• नरवेनि नर्ड इउनिभारसिटियाव बुहुम दांखा रावबिगियानि Dr Bruce Moren Duollja, Associate Professor, NORD UNIVERSITY, प्रफेसार एसबिजर्न कलबार्ग गेदेमा बिथांमोननि बिबुंथिफ्रा जोंनि थाखाय जोबोद बेसेनथि गोनां खाफालगोनांमोन। थारैनो बिथांमोननि बेसेन गोसा बिबुंथिफ्रा जोंनि थाखाय जोबोद थुलुंगा खांनायमोन। बर’ रेबग्रा जथुमा बर’ राव थुनलाइ अनसायग्रा लिरगिरि बिथांमोननि बिथोन आरो मदद लानानै इयुन समाव गोबां खामानि मावफुंनो बिथांखि लादों।